विवाहबाट विश्राम लिन नपाउँदै कोठेवालीको भूमिकामा प्रियंका

सोसल मिडियामा विवाहमा आतिशबाजीका लागि ट्रोलको सामना गरिरहेकी प्रियंका चोपडा विवाहको व्यस्तताबाट विश्राम लिन नपाउँदै नयाँ चलचित्र  ‘द स्काई इज पिंक’को सुटिङमा व्यस्त हुँदैछिन् । विवाहको भव्य प्रवन्ध मिलाइएको भन्दै उपस्थित पाहुनाको चर्चा पाईरहेकी प्रियंकाले अर्के तर्फ विवाहमा हात्ती–घोडाको प्रयोग गरेको भन्दै आरोप खप्न परेको छ ।

चलचित्र  ‘द स्काई इज पिंक’ यौन व्यवसाय सञ्चालक गंगुबाई कोठेवालीको जिन्दगीमा आधारित हुनेछ । गंगुबाई यौनकर्मीको अधिकारको वकालत गर्ने महिला हुन् । भारतीय समाचार अनुसार धेरै महिलालाई दुःखद परिस्थितिबाट बचाउनका लागि नै गंगुबाईले उनीहरूलाई यौन व्यवसायको काममा लगाएकी थिइन् । उनको नाम भारतका चर्चित व्यक्तिहरूसँग पनि जोडिएको थियो ।

प्रियंकाले चलचित्रमा गंगुबाईको भूमिका निभाउने छिन् । उनले आधिकारिक रुपमा चलचित्रबारे बोलेकी छैनन् । तर उनी आफैले चाँडै चलचित्र घोषणा गर्ने तयारीमा छिन् ।

बताइएअनुसार सञ्जयलीला भन्सालीको नयाँ चलचित्र ‘हीरा मण्डी’मा पनि  प्रियंका चाँडै नै अभिनय गर्दैछिन् । उनको यो चलचित्र  सञ्जयलीला भन्सालीसँग दोस्रो सहकार्य हुनेछ। किनकी उनले सञ्जयको चलचित्र ‘बाजीराव मस्तानी’मा पहिले नै अभिनय गरिसकेकी छिन् । यसअघि प्रियंकाले अभिनेता सलमान खानको चलचित्र ‘भारत’बाट हात झिकेपछि सञ्जयको नयाँ चलचित्र ‘गुस्ताखियाँ’मा अभिनय गर्ने चर्चा थियो । तर प्रियंकाले सञ्जयको कुनै पनि चलचित्रमा काम गर्ने इच्छा नगरेको प्रियंकाकी आमा मधुले खुलाएकी थिइन् ।