‘एउटा घाउ देउ’सौरव र साराको रोमान्स

हङकङमा बस्दै आएका नेपाली गायक गणेश न्यौपानेको नयाँ गीत ‘एउटा घाउ देउ’को भिडियो सार्वजनिक भएको छ । गौरव पहाडी र सारा शिरपालीले फिचरिङ गरेको गीतमा आफ्नो प्रेमी गौरवलाई दुःखित बनाउन साराले गर्भवती बनेको अभिनय र अन्तिममा त्यसको वास्तविकता खुलेपछि खुशी भएका गौरवको भावलाई झल्काइएको छ ।

नगरकोटको बोजिनी होटलमा छायांकन गरिएको भिडियोको निर्देशन समन अधिकारीले गरेका हुन् । भिडियोमा साराले गौरवलाई अप्रिल फूल मनाएको प्रसंगलाई देखाइएको छ । फिल्म ‘रुद्र’बाट नेपाली फिल्ममा डेब्यु गरेकी सारा पछिल्लो पटक निखिल उप्रेतीसँग फिल्म ‘पिँजडा ब्याक अगेन’मा देखिएकी थिइन् । उनी यतिबेला फिल्म ‘सुश्री सम्पत्ति’मा व्यस्त छिन् ।

नायक गौरवले थुप्रै फिल्ममा अभिनय गरे पनि उनी चर्चित गीत ‘साइली’मा साइलाको चरित्रबाट आफूलाई स्थापित गराए । यो गीतमा भूपेन्द्र खड्काको शब्द, दिनेश सुब्बाको संगीत, फडिन्द्र राईको एरेञ्ज, दिपेश प्रधान र प्रकाश केसीको मास्टरिङ र मिक्सिङ, निरोज श्रेष्ठको छायांकन र सुप्रिम पराजुलीको सम्पादन छ ।

हेर्नुहोस भिडियो: